මදුනාගල උණුදිය පොකුණ....

 මදුනාගල උණුවතුර ලිං.......
ඇඹිලිපිටිය හා හම්බන්තොට නගරයන්ට මැදිව සූරියවැව නගරයට ආසන්නයේ පිහිටා ඇති සංචාරකයන්ගේ ආකර්ෂණය දිනාගත් ස්ථානයක් ලෙස මදුනාගල උණු දිය උල්පත් හැදින්විය හැකිය. ඇඹිලිපිටිය සිට පදලංගල හරහා සූරියවැව මාර්ගයේ හතරමං හංදිය නමින් හැදින්වෙන ස්ථානයෙන් හැරී කි.මී. 4 ක් පමණ ගමන් කල විට මෙම උණු දිය උල්පත් වෙත ලගාවිය හැකිය. එක් පසකින් මහ රහතන් වැඩ සිටි ඓතිහාසික මදුනාගල ආරන්‍ය
සේනාසනයත් අනෙක් පසින් පුරාවිද්‍යාත්මක වශයෙන් ඉතා වටිනා ඉපැරණී චිත්‍ර සොයාගත් කරඹගල වන රක්‍ෂිතයටත් මැදිව සුන්දර කුඹුරු යායක් මැද මෙම ස්ථානය පිහිටා ඇත. නූතනයේ දකුණූ පළාත් සංචාරක අමාත්‍යංශය විසින් සංචාරක ගම්මානයක් ලෙස සංවර්ධනය කරමින් මෙම ස්ථානයට තවත් සංචාරක අංගයන් බොහොමයක් එක්කර තිබේ. ස්වාභාවික උණු දිය ස්නානය කිරීමේ පහසුකම යනු සංචාරකයන්ට ඉතා මහගු අවස්ථාවකි

   සංචාරකයන්ගේ ගමන් විඩාව දුරු කර ගනිමින් ඖෂධීය ගුණයන්ගෙන් සම්පූර්ණ වූ උණු දිය ස්නානය කිරීමේ පහසුකම් මෙම ස්ථානයේ ඇත. සීතල සුලං හමායන කුඹුරු යායක් මැද සිට, බොහෝ ඖෂධ ගුණයන්ගෙන් සපිරි ස්වාභාවික උණු දිය ස්නානය කිරීමේ පහසුකම යනු සංචාරකයන්ට ඉතා මහගු අවස්ථාවකි.

ප්‍රවේශ වන ස්ථානය නව සංචාරක ව්‍යාපෘතිය මගින් සකස් කිරීමෙන් පසුව

 

උණු දිය උල්පත් ඇතිවන ආකාරය

වර්ථමානයේ මෙම ස්ථානයේ ඇති උණු දිය උල්පත වටකොට ජල ටැංකි පහක් ඉදිකර ඇත. මෙම ජල ටැංකි පහේ උෂ්ණත්වය එකින් එකට වෙනස් වන ආකාරයට ඉදිකර ඇත. එනම්, උණු දිය උල්පත වටා බැදි ජල ටැංකිය වඩා වැඩිම උෂ්ණත්වයක් ඇති ජල ටැංකියයි. මෙහි ජලය තුළ උණුසුම නිසා දිය බුබුළු මතුවනු දැකිය හැකිය. එහි ජලය ටැංකියෙන් ටැංකියට ගලා යමින් ක්‍රමයෙන් උෂ්ණත්වය අඩු වන ආකාරයට සකස් කර ඇති අතර, සංචාරකයන්ට දිය නෑම සදහා එය විශාල පහසුවක් ගෙන දී ඇත.

කුරුළු උයනෙහි දර්ශනයක්

මෙම ස්ථානයෙහි කුරුළු උයනක්, මින් මැදුරක්, කෞතුකාගාරයක්, සංචාරක නැවතුම්පලක් මෙන්ම පළතුරු උයනක්ද ඉදිකර ඇත්තේ මෙම සංචාරක ගම්මාන සංවර්ධන වැඩපිළිවෙල යටතේය. මෙම කුරුළු උයන තුළ විවිධ ගිරවුන් වර්ග, තාරාවන්, පරවියන්, හාවුන්, කොබෙයියන් වර්ග මෙන්ම තවත් බොහෝ සතුන් වර්ගයන් සිටින අතර, මින් මැදුර තුළද විවිධ දුර්ලභ මත්ස්‍ය වර්ග ගනනාවක් ඇත.

කුරුළු උයන තුළ සිටින සතුන්ගෙන් කොටසක්

මෙම උණුදිය උල්පත් ජලයේ ඇති රසායන හා භෞතික ගුණයන් පහත පරිදි වේ.
භෞතික ගුණයන් (Physical Properties)
උෂ්ණත්වය (Temperature)                    40     C^O
PH අගය (PH)                                         7.0
සන්නායකතාවය (Conductivity)            7.1      sm^-1
ඝණ ද්‍රව්‍ය (Total Solids)                         5288     mg / l
රසායනික ගුණයන් (Chemical Properties)
Bicarbonate (බයිකාබනේට) (HCO)            20.1      mg / l
Chloride (ක්ලෝරයිඩ්) (Cl)                            2590     mg / l
Sulphate (සල්පේට) (SO₄^-2)                           138.4    mg / l
Nitrate (නයිට්‍රේට) (NO₃^-2)                              1.02      mg / l
Phosphate (පොස්පේට) (PO₄^-3)                   3.7      mg / l
Silica (සිලිකා) (SiO)                                          54.9      mg / l
Calcium (කැල්සියම්) (Ca)                               533.0    mg / l
Magnesium (මැග්නීසියම්) (Mg)                  4.80      mg / l
Sodium (සෝඩියම්) (Na)                                    1110.0  mg / l
Patassium (පොටෑසියම්) (K)                         22.6      mg / l
Lithium (ලිතියම්) (Li)                                       0.4        mg / l
Iron (යකඩ) (Fe)                                          0.03      mg / l
Zink (සින්ක්) (Zn)                                      0.01      mg / l
Lead (ඊයම්) (Pb)                                    0.08      mg / l
Cadium (කැඩියම්) (Cd)                                   0.01      mg / l
Florid (ෆ්ලෝරයිඩ්) (F)                                    1.6        mg / l
Sulfide (සල්ෆයිඩ්) (S^-2)                                   40.15    mg / l
Manganese (මැංගනීස්) (Mn)                       0.04      mg / l
(මූලාශ්‍රය – භූ විද්‍යා දෙපාර්තමේන්තුව 2005)

සංචාරක උද්‍යානය තුළ දර්ශනයක්

උණුදිය උල්පත්හි අඩංගු වායූන්
Hydrogen (හයිඩ්‍රජන්) (H₂)%                                     0.31
Oxygen (ඔක්සිජන්) (O₂)%                                         0.77
Nitrogen (නයිට්‍රජන්) (N₂)%                                       98.8
Carbon dioxide (කාබන්ඩයොක්සයිඩ්) (Co₂)%       0.12
(මූලාශ්‍රය- ෆොන්සේකා ජී. එම්. 1998)

මාර්ගය දෙපස ඇති සුන්දර කුඹුරු යාය

මෙම සංචාරක උද්‍යානයක් ලෙස සංවර්ධනය කර ඇති උණූ දිය උල්පත් වෙත ලගා වීමට ඇති මාර්ගය දෙපස ඇති සුන්දර කුඹුරු යාය ගත සිත විඩාව දුරු කරන සුන්දර ආශ්වාදයක් සංචාරකයන්ට ලබා දේ. දකුණු ප්‍රදේශයේ සංචාරය කරන ඔබ නැරඹිය යුතුම ස්ථානයක් ලෙස මෙම මදුනාගල උණුදිය උල්පත් හැදින්විය හැකිය. මෙම සංචාරය තුළ ඔබට ආසන්නයෙන්ම නරඹිය හැකි ස්ථාන ලෙස ‍‍ඓතිහාසික මහානාග රාජධානිය පිහිටා තිබූ රම්භා විහාර පුරාවිද්‍යා රක්ෂිතය, මදුනාගල ආරණ්‍යය, කරඹගල ලෙන් ආදිය හැදින්විය හැකිය.

  මදුනාගල මෙන්ම ත්‍රිකුණාමලය නගරයට අයත් කින්නියා ප්‍රදේශයේද මෙවැනි උණුවතුර ලිං පිහිටා ඇත.ත්‍රිකුණාමලයට සංචාරය සදහා යන සංචාරකයන් බොහෝ දෙනා මෙම උණුවතුර ලිං නැරඹීමට අමතක කරන්නේ නැත. 

කින්නියා උණුවතුර ලිං

ගූගල් සිතියම



 මදුනාගල වනආරණ්‍ය සේනාසනය  


                 මදුනාගල යැයි කියුවිට  අපට එකවර  මතකයට නැගෙන්නේ  උණුදිය ළිංය. උණුදිය උල්පත් මෙන්ම වැදගත්වූ බෞද්ද  බැතිමතුන්ගේ නෙත් යොමුවිය යුතු ඓතිහාසික පුදබිමක්‌ ද මදුනාගල ඇත.

උණුදිය ළිං ඇති ප්‍රදේශයට ආසන්නව කොග්ගල්ල ගමට නුදුරුව වන රක්‌ෂිතයේ ඇති මෙම ඓතිහාසික ආරණ්‍ය සේනාසනය ආරම්භ කර ඇත්තේ බෝධිසත්ව ගුණෝපේත අතිපූජ්‍ය වතුරුවිල ශ්‍රී ඤාණානන්දාභිධාන වනවාසී මහනාහිමිපාණන් වහන්සේය. 1946 ජුනි මස 30 වැනිදා මෙම වනාන්තර ප්‍රදේශයට පැමිණි ගල්ලෙනක වාසය කරමින් මෙම ආරණ්‍ය ආරම්භ කර ඇත. මාහිමියන්ගේ ප්‍රධාන අරමුණ වී ඇත්තේ නැතිවී ගිය ආරණ්‍ය සම්ප්‍රදාය යළි ගොඩනැංවීමය. කළුගල ආරණ්‍ය සෙනසුනේ සිට මෙහි පැමිණි මාහිමියෝ ගිහිවාසයක්‌ නැති අලි කොටි වලසුන් සිටින මේ වනයේ ජීවත්වෙමින් අතිශයින් දුෂ්කර ජීවිතයක්‌ ගත කළහ.

වර්ෂ කීපයක්‌ ගතවනවිට මදුනාගල අංගසම්පූර්ණ ආරණ්‍යයක්‌ බවට පත්කරන්නට උන්වහන්සේ සමත්වූහ. උපෝසථාගාරය සහිත විහාර මන්දිරය තපෝවනය, නන්දවනය කඨාරම් කෙටූ පැරණි ගල්ලෙන් සහිත මෙම භූමි භාගය පෙර රහතුන් වහන්සේලා පාදස්‌පශ_ය ලැබූ පින්බිමක්‌ බවට ප්‍රකටය. පෞරාණික ගල් කටාරම්ද සෙනසුනේ තවමත් දක්‌නට ඇති බ්‍රාහ්මී අක්‌ෂර සහිත සෙල්ලිපි ඊට සාක්‌ෂි දරයි.

මදුනාගල ආරණ්‍ය සේනාසනය (උපුටාගැනීම http://www.nuwans.com)

 
මදුනාගල ආරණ්‍යයේ යෝගාවචර භික්‌ෂූන් වහන්සේලා 10 නමක්‌ මේ දිනවල වැඩ වාසය කරති. එහි නේවාසික අධිපති ධුරය දරනුයේ කුරුවිට අනුරුද්ධ ස්‌වාමීන්ද්‍රයන් වහන්සේය. මදුනාගල වන සෙනසුන වතුරවිල වනවාස සංඝ මූලස්‌ථානාධිපති අතිපූජ්‍ය මහකන්දේ රතනපාල අනුනායක ස්‌වාමීන්ද්‍රයන් වහන්සේ යටතේ පාලනය වේ. මෙහි ලෙන් රැසකි. ඒවායේ භික්‌ෂූන් වහන්සේලා වැඩ වාසය කරති.
මහානාග ලෙන, ඇතාලෙන, දියනාලෙන, පවංකර ලෙන, රක්‌ත ලෙන, පළමු ලෙන ආදී වශයෙන් ගල්ලෙන් හඳුන්වා තිබේ. මේ ලෙන්වලට නම් තබා ඇත්තේ කිසියම් ඓතිහාසික හේතූන් අනුවය. මේ ගැන කියන ලෙන්වාසී භික්‌ෂූන් වහන්සේලා ඇතාගලින් වැටුණ තැන ඇති ලෙන ඇතා ලෙන වශයෙන් හඳුන්වන බව කීහ. යෝගාචර වනවාසී භික්‌ෂූන් වහන්සේලාට දන් පිළිගැන්වීමට දිවයිනේ නන්දෙසින් පිරිස්‌ මෙහි පැමිණෙති. දන්දීමට නියමිත දිනට පෙර දින මදුනාගලට එන මේ බැතිමතුන්ට නැවතීමට ශාලා පහසුකම්ද තිබේ. නේවාසික කළමනාකරුවකු යටතේ කටයුතු සංවිධානය වේ. තපෝ භූමියේ සිට කි. මී. 2 ක්‌ පමණ දුරින් රක්‌ෂිත භූමියෙහිම පිණ්‌ඩපාත ශාලාව පිහිටා ඇත. දන්දීමට එන පිරිස පෙරදින ගිලන්පස, පසුදා උදේ දානය, දහවල් දානය පිරිනමා පිං ලබා ගනී. අවුරුද්දේ සෑම දිනකම දානය බාරගෙන ඇති බවත්, ආරණ්‍යයේ අවශ්‍යතා සඳහා දායකයන්ගෙන් උදව් කෙරන බව දැනගත හැකිවිය. පොහෝ දිනවලට සිල් සමාදන්වීමට විශාල වශයෙන් අය එති. රාජ්‍ය අනුග්‍රහය ඇතිව මෙම ආරණ්‍යයේ අවශ්‍යතාවයන් ගැන සොයා බලා හම්බන්තොට දිස්‌ත්‍රික්‌කයේ කඩිනමින්ම සංවර්ධනය විය යුතු පුණ්‍ය භූමියකි. තමන්ම සෝවාන් වූවා යයි කියමින් වැදිබණ කියන අයට වැඳ නමස්‌කාර කරන අය බහුල වශයෙන් සිටින යුගයක මදුනාගල වැනි ආරණ්‍යසේනාසනයක භාවනාවේ යෙදෙමින් බෞද්ධ ධර්මය, ප්‍රචලිත කරන යෝගාවචර භික්‌ෂූන් වහන්සේ දැකීමත් සහනයකි.
  
හම්බන්තොට  ආවම මදුනාගලත් යන්න අමතක කරන්න එපා....
ඔබේ අදහස ලියලම යන්න ....